"ආයුබෝවන්" එන්න අප හා එක්වන්න අපට ලියන්න,අදහස් හුවමාරු කරගන්න අපි "ප්‍රතිභා මාධ්‍ය එකමුතුව pmn.srilanka@gmail.com" https://www.facebook.com/prathiba.media +94412294982

Thursday, December 8, 2016

සංහිදියාවෙන් සපිරි සමාජයක් ගොඩනැගීමට නම්


 සැමට යුක්තිය සාධාරණය ඉටුකිරීමට කාලය එළැඹී ඇත.

සටහන - සාගරිකා වසන්ති, සංස්කාරක මණ්ඩල සාමජිකා - විපරමි පුවත්පත


සිංහල හින්දු අළුත් අවුරුදු උදාවේදී හිරු මීන මේෂ රාශිය සංක්‍රමණය වන බව අප අසා ඇත්තෙමු. මෙම සංක්‍රමණය වන කාලය නොනගතය හෙවත් සංක්‍රාන්තික කාලය යනුවෙන් ජ්‍යෝතීර්වේදයේ දී හදුවනු ලබයි. සංක්‍රාන්තිය යනු කිසියම් කාලය පරාසයක සිට තවත් කාල පරාසයකට සංක්‍රමණය වන කාලයකි. එම නිසා මෙම කාලයට සංක්‍රාන්තිය යනුවෙන් සිංහල භාෂාවේ දී හදුන්වා ඇත.

කෙසේ නමුත් සංක්‍රාන්ති ය තවත් ආකාරයකින් අර්ථ නිරූපනය කිරීමට වර්තමානයේ ලෝකයේ රටවල් හුරුවී ඇත. ඒ අනුව ශ්‍රී ලංකාවේ වර්තමානයේ සංක්‍රාන්ති වචනයට යුක්තිය යන වචනය ද එකතු කර සංක්‍රාන්ති යුක්තිය නැමති වචනයක් භාවිතා කිරීමට හුරුවී සිටී. Transitional Justice යන ඉංග්‍රීසි වචනයන් හි පරිවර්තනයක් ලෙස සංක්‍රාන්ති යුක්තිය වචනය හැදින්විය හැකිය. මෙය හුදෙක්ම පදගත පරිවර්තනයකි. ගැටුම් සහ ප්‍රචන්ඩකාරී තත්ත්යන්ගෙන් තොර සාමකාමී, සංහිදියාවෙන් සපිරි සමාජයක් ගොඩනැගීම මෙම වචනයෙහි ගැබ් වී ඇති බව පසුගිය දිනක  ප්‍රතිභා මාධ්‍ය ජාලය මගින්  සංක්‍රාන්ති යුක්තිය හා ව්‍යවස්ථා ප්‍රතිසංස්කරණ ක්‍රියාවලිය පිළිබදව ප්‍රාදේශීය මට්ටමින් ප්‍රජාව දැනුවත් කිරීමේ අරමුණින් ගාල්ල, මාතර, හම්බන්තොට සහ මොනරාගල දිස්ත්‍රික්කයේ පුවත්පත් කලාවේදීන් වෙනුවෙන්  පවත්වන්නට යෙදුනු දෙදින පුහුණු වැඩසටහනේ දී අනාවරණය විය.

සංක්‍රාන්ති යුක්තිය යනු කුමක්දයි විමර්ෂණය කිරීමේදී මෙහෙදී හෙළි වූයේ කිසියම් රටක පැවති යුධමය වාතාවරණයක්, දරුණු ප්‍රචණ්ඩකාරී වාතාවරණයක් නිමවීමෙන් පසුව එවැනි සිදුවීම් ඉදිරියට තවත් ඇති නොවීමට වගබලා ගැනීම සදහා නීතියේ අධිපත්‍ය ඇතිකිරීම සදහා යොදාගත් වැඩපිළිවෙලක් බවයි.

ඒ අනුව දැනගැනීමට ඇති අයිතිය, යුක්තියට ඇති අයිතිය, හානි පූර්ණයට ඇති අයිතිය, නැවත සිදුනොවන බව සහතික කිරීම වැනි ප්‍රධාන අංග හතරක් සංක්‍රාන්ති යුක්තියට අයත්වේ.  ශ්‍රී ලංකාවේ පැවති යුද්ධය නිසා සිංහල,දෙමළ, මුස්ලිම් ආදී සෑම ජාතියකට අයත් ජනතාව පීඩාවට සහ විපතට පත්වූවා පමණක් නොව මිලියන ගණනක් වටිනාකමක් සහිත වූ දේපල ද හානියට පත්විය. මෙම පීඩාවට පත්වූ ජනතාවට සාධාරණය ඉටුවීම අනිවාර්යෙන්ම සිදුවිය යුතු දෙයකි. එය ජනවර්ගය, තරාතිරම, පදිංචි ප්‍රදේශය අනුව නොව පීඩාවට පත් පොදු ජනයාගේ පරම අයිතියක් ලෙස සලකමින් ඉටුකීරීමට බලධරයන්ගේ ප්‍රධාන වගකීමක් බවට පත්ව ඇත.

සංක්‍රාන්ති යුක්තිය ක්‍රියාත්මකවීමේ ක්‍රමවේදය පිළිබදව සොයා බැලීමේ දී ඉහත සදහන් කරන ලද කරුණ කිහිපය යටතේඑය වෙන් වෙන් වශයෙන් අර්ථ දැක්වීම සිදුකල හැකිය. යුද්ධය හෝ ප්‍රචන්ඩකාරී සිදුවීම් අවසන් වීමෙන් පසුව ඇත්ත වශයෙන්ම සිදුවූයේ කුමක්ද යන්න පිළිබදව දැනගැනීමට සමස්ථ සමාජයටම අයිතියක් තිබේ. එම අයිතිය අනිවාර්යෙන්ම හිමිවිය යුතු වේ. මෙය සත්‍ය දැනගැනීමට ඇති අයිතිය යනුවෙන් සංක්‍රාන්ති යුක්ති ක්‍රියාවලිය යුතු අන්තර්ගතව ඇත. මේ පිළිබදව රජයේ ද පුළුල් අවධානය යොමු විය යුතු අතර එමගින් සිදුවූ සත්‍ය සිදුවීම කුමක්දැයි යන්න සාක්ෂි විමසීම් තුලින් ලබාගෙන සංරක්ෂණය කිරීමට කටයුතු කිරීම රජයට පැවරී ඇති ප්‍රධාන කාර්ය්‍ය භාරයක් වනු ඇත. යම් හෙයකින් පීඩාවට පත්වූ මහජනතාව හෙවත් වින්දිතයන්ට සාධාරණ සහනයක් ලබා ගැනීම හෙවත් නීතියේ පිහිට ලබාගැනීමට ඇති අයිතිය යුක්තියට ඇති අයිතිය යනුවෙන් හදුන්වනු ලබයි. මෙහදී ජනතාවට පීඩාවට පත්කරමින් සිදුකර ඇති දෑ පිළිබදව විධිමත් විමර්ෂණයක්  පැවැත්වීමටත් නඩු පැවරීම වැනි  ක්‍රියාමාර්ග වලට එළැබීමේ කාර්ය්‍ය භාරය රජය වෙත පැවරී පවතී.

සංක්‍රාන්ති යුක්ති ක්‍රියාවලියේ අනෙකුත් ප්‍රධාන කර්තව්‍ය වුයේ හාණි පුර්ණයට ඇති අයිතිය වෙනුවෙන් කටයුතු කිරීමයි. එමගින් පීඩාවට හා හානියට පත් වූ ප්‍රජාවට ඊට අදාළ වටිනාකමින් යුක්ත වන්දි ලබා ගැනීමට අයිතිය පවතී. එහිදී ඒ ජනතාව හෝ ජනවර්ගයන් හානියට පත්වී ඇති ආකාරය පිළිබදව සොයා බලා ඒ අනුව ප්‍රතිපත්ති සම්පාදනය කරමින් අදාල ජනකොටස් වෙත සහනයක් ලබාදීමට රජයට පැවරී ඇති තවත් වගකීමක් වනු ඇත. තව දුරටත් එවැනි ප්‍රචන්ඩ ක්‍රියා සිදුනොවීමටත්, එවැනි ප්‍රචන්ඩ ක්‍රියා සිදුවහොත් එයින් ආරක්ෂා වීමට වින්දිතයන් ට සහ සමාජයට ඇති අයිතිය පිළිබදව සංක්‍රාන්ති යුක්ති ක්‍රියාවලියේ නැවත සිදුනොව බව සහතික කිරීම තුලින් පැහැදිලි කල හැකිය. මෙහිදී  ප්‍රතිසංස්කරණ සිදු කිරීමට සහ නැවත සිදු වීම වැළැක්වීමට රජයේ තවත් ප්‍රධාන වගකීමක් බවට පත්ව ඇත.  

කෙසේ වූවද, සංක්‍රාන්ති යුක්ති ක්‍රියාවලිය පිළිබදව අවධානය යොමු කිරීමේදී මෙය එක්සත් ජාතීන්ගේ සංවිධානය විසින් රටවල් විස පහක පමණ ක්‍රියාත්මක කිරීමෙන් අත්දැකීම් විශාල ප්‍රමාණයක් ලබා ගෙන ඇති බව සදහන් කළයුතුවේ.


මිහිපිට ජීවත්වන සෑම සත්වයකුට සතුටින් නිදහසින් ජීවත් වීමට පරම අයිතියක් ඇත. එම අයිතිය සුරකීම සමාජයේ ජීවත්වන සෙසු සියළුම දෙනාගේ ප්‍රධාන වගකීමක් බව පුන පුනා සදහන් කළ යුතු නොවේ. එම නිසා මේ පිළිබදව පුළුල් අවධානය යොමුකර යුද්ධයෙන් සහ ප්‍රචන්ඩකාරී තත්ත්වයන් හමුවේ පීඩාවට පත්වූ ජනතාවට යුක්තිය සාධාරණය ඉටුකරමින් ඔවුන්ට සැබෑ සංක්‍රාන්තිය ඇතිකරලීම ප්‍රධාන වගකීමක් බවට වර්තමානයේ පත්ව ඇත. 

No comments:

Post a Comment